નવસારીઃ એક ચોંકાવનારી ઘટના બની હતી. ડાભેલામાં ગૌહત્યા રોકવા ગયેલા યુવકની કસાઈઓએ હત્યા કરી હતી. જેથી લોકોમાં આક્રોશ ફેલાયો હતો. મળતી વિગત પ્રમાણે, ડાભેલ ગામમાં પશુ કતલની પ્રવૃત્તિમાં જોડાવાનો ઇનકાર કરવા બદલ કસાઈઓ દ્વારા એક વ્યક્તિ પર કથિત રીતે હુમલો કરવામાં આવ્યો હતો. ઇજાગ્રસ્ત દીપક હળપતિનું નવસારી સિવિલ હોસ્પિટલમાં સારવાર દરમિયાન મૃત્યુ થયું હતું.
ક્યારે બની હતી ઘટના
ભોગ બનનારના પરિવારના જણાવ્યા અનુસાર, આ ઘટના આશરે ચાર-પાંચ દિવસ પહેલા બની હતી. દીપકે ગાયની કતલ કરવા માટે આરોપીઓ સાથે જવાનો ઇનકાર કર્યો હતો. આ ઇનકારને કારણે બોલાચાલી થઈ હતી, ત્યારબાદ તેના પર કથિત રીતે હિંસક હુમલો કરવામાં આવ્યો હતો. હોસ્પિટલમાં ગંભીર હાલતમાં રહેલા દીપકનો એક વીડિયો સોશિયલ મીડિયા પર વાયરલ થયો હતો, જેનાથી આ મામલો લોકોના ધ્યાને આવ્યો હતો. તેની પત્ની સુનીતાબેન હળપતિએ આક્ષેપ કર્યો હતો કે તેના પતિને નિર્દયતાથી માર મારવામાં આવ્યો હતો અને ગંભીર રીતે ઇજાગ્રસ્ત હાલતમાં છોડી દેવામાં આવ્યા હતા.
પોલીસે શું કહ્યું
પોલીસે જણાવ્યું કે, હુમલા દરમિયાન થયેલી ઇજાઓને કારણે પીડિતનું મૃત્યુ થયું હતું. હુમલામાં સંડોવાયેલા આરોપીઓને સંબંધિત કલમો હેઠળ અટકાયતમાં લેવામાં આવ્યા છે અને વધુ તપાસ ચાલુ છે. સામાજિક કાર્યકર જય પટેલ નાગરાજે હોસ્પિટલમાં પીડિતની મુલાકાત લીધી અને આ કેસની વિગતો શેર કર્યા પછી આ ઘટના જાહેર થઈ હતી. તેમણે આક્ષેપ કર્યો હતો કે ડાભેલમાં હળપતિ સમાજના લોકો હેરાનગતિનો સામનો કરી રહ્યા છે અને તેમણે તમામ આરોપીઓ સામે કડક કાર્યવાહી અને પીડિત માટે ન્યાયની માંગ કરી હતી.
