(અમારા પ્રતિનિધિ તરફથી)

અમદાવાદઃ પંચમહાલ જિલ્લાના જાંબુઘોડા તાલુકામાં કણજીપાણી ગ્રામ પંચાયતના ઇન્ચાર્જ તલાટી દ્વારા એક જ દિવસમાં 24 લગ્નો નકલી દસ્તાવેજોનો ઉપયોગ કરીને નોંધાવવામાં આવ્યા હોવાના અને બોગસ લગ્ન પ્રમાણપત્રોના બદલામાં અરજદારો પાસેથી લગભગ રૂ. 50 લાખ વસૂલવામાં આવ્યા હોવાના આરોપો બહાર આવ્યા બાદ તેમને સસ્પેન્ડ કરવામાં આવ્યા છે. ઉત્તર ગુજરાત સ્થિત સરદાર પટેલ ગ્રુપ (એસપીજી)ના ચેરમેન લાલજી પટેલની ફરિયાદ બાદ આ કાર્યવાહી કરવામાં આવી હતી, જેના કારણે જિલ્લા પંચાયતે તપાસ શરૂ કરી હતી.

કણજીપાણી અને ઉધવાન સહિત ચાર ગ્રામ પંચાયતનો હવાલો સંભાળતા તલાટી કમ મંત્રી એ. કે. મેઘવાલને જિલ્લા વિકાસ અધિકારી દ્વારા તાત્કાલિક અસરથી સસ્પેન્ડ કરવામાં આવ્યા હતા. જાંબુઘોડા તાલુકા પંચાયતે પણ આરોપોની તપાસ માટે એક અલગ તપાસ ટીમની રચના કરી છે, અને તેના તારણો જિલ્લા અધિકારીઓને સુપરત કરવામાં આવશે, તેવી માહિતી સૂત્રો પાસેથી મળી હતી. 

અધિકારીઓના જણાવ્યા અનુસાર કણજીપાણી અને ઉધવાણના સરપંચોએ અગાઉ તાલુકા પંચાયતને જાણ કરી હતી કે લગ્નોની ખોટી રીતે નોંધણી થઈ રહી છે. ત્યારબાદ એસપીજી ગ્રુપે પણ આક્ષેપો કર્યા હતા. આ આરોપો પર કાર્યવાહી કરતા, તાલુકા પંચાયતે મેઘવાલને નોટિસ ફટકારી અને સસ્પેન્ડ કરવા માટે ઝડપથી કાર્યવાહી કરી હતી. 

પંચમહાલ જિલ્લામાં આવી ગેરરીતિઓ પહેલી વાર જોવા મળી નથી. શેહરાની ભદ્રલા, ઘોઘંબાની કંકોડાકોઈ અને ભૂતપૂર્વ નાથકુવા ગ્રામ પંચાયતોમાં બોગસ લગ્ન નોંધણીના બનાવો અગાઉ નોંધાયા હતા. ભૂતકાળમાં, આ પંચાયતોના તલાટીઓ સામે પણ તપાસ ટીમો બનાવવામાં આવી હતી, જેના પરિણામે ભદ્રલા પંચાયતના તલાટી પી. એમ. પરમારને દૂર કરવામાં આવ્યા હતા અને કંકોડાકોઈના તલાટીની બદલી કરવામાં આવી હતી.

અગાઉની તપાસમાં જાણવા મળ્યું હતું કે કંકોડાકોઈ પંચાયતે સાત મહિનામાં ૩૬૧ લગ્નો નોંધાવ્યા હતા, જેમાં ઘણા લગ્ન વિસ્તારની બહારના અને લઘુમતી સમુદાયના પણ હતા, જેના કારણે સબમિટ કરાયેલા દસ્તાવેજોની સત્યતા પર સવાલ ઉભા થયા હતા.
મેઘવાલનો એક વીડિયો સોશિયલ મીડિયા પર વાયરલ થયા બાદ તાજેતરનો વિવાદ વધુ વકર્યો હતો. વીડિયોમાં, તે એક જ વર્ષમાં લગભગ ૨૦૦૦ લગ્નો નોંધાવ્યા હોવાનો અને દરેક નોંધણી દીઠ આશરે ૨,૫૦૦ રૂપિયા એકઠા કર્યા હોવાનો દાવો કરતો સાંભળવા મળે છે, જે આશરે રૂ. ૫૦ લાખ કમાણી થાય છે. તે એમ પણ કહેતો સાંભળવા મળે છે કે તેણે આ ભંડોળનો ઉપયોગ કરીને રાજસ્થાનમાં જમીન ખરીદી હતી. 

વાયરલ વીડિયો બાદ, જાંબુઘોડા તાલુકા પંચાયતે મેઘવાલના હવાલે ચાર પંચાયતોમાં ૨૦૨૫ માં કરવામાં આવેલા તમામ લગ્ન નોંધણીઓની તપાસ કરવા માટે એક ટીમની રચના કરી હતી. જે આ લગ્ન પ્રમાણપત્રોની ખરાઈ કરશે, તેવી માહિતી સૂત્રો પાસેથી મળી હતી.