ભુજઃ આજથી દસ વર્ષ પહેલાં કચ્છના આદિપુર શહેરમાં ટ્રાફિક નિયમ ભંગ બદલ અરજદાર વિરુદ્ધ કેસ દાખલ કરાવ્યા બાદ લાંચ માગનારા બે પોલીસ કર્મચારીને ત્રણ વર્ષની સખત કેદનો ધાક બેસાડતો ચુકાદો આપવામાં આવ્યો હતો. પ્રાપ્ત વિગતો મુજબ, આદિપુરમાં રહેતા શિવજી તેજા મહેશ્વરીને ગત તા. ૨૯-૨-૨૦૧૫ના રોજ પોલીસે ટ્રાફિક નિયમન ભંગ બદલ તેમની સામે ગુનો નોંધ્યો હતો.
જે-તે સમયે પોલીસ કર્મચારી ફિરોઝખાન જુસબખાન પઠાણે તેમને જામીન પર મુક્ત કર્યા હતા અને આ કેસના ફરિયાદી પાસેથી રૂા. ૧૦૦૦ની લાંચની માંગ કરી હતી, રકઝકના અંતે રૂા. ૫૦૦ આપવા નક્કી કરાયા હતા. આરોપીએ તા. ૩૦-૩-૨૦૧૫ના સાંજે સાત-આઠ વાગ્યે પોલીસ મથકે આવીને ૫૦૦ રૂપિયા આપી જવા તથા ડ્રાઇવિંગ લાયસન્સ પરત લઇ જવા જણાવ્યું હતું. આ અંગે અરજદારે લાંચ રુશવત વિરોધી શાખા સમક્ષ ફરિયાદ કરી હતી. ખરાઇ કરવા તા. ૩૦-૩ના રોજ બે સરકારી પંચો સાથે રાખી વોઇસ રેકોર્ડની મદદથી આદિપુર પોલીસ મથકે લાંચનું છટકું ગોઠવવામાં આવ્યું હતું, જેમાં ફરિયાદીએ પોતાના મિત્રના મોબાઇલથી ફિરોઝખાનનો સંપર્ક કરતાં પોલીસ મથકે ચોક્કસ સમયે આવવાનું કહ્યું હતું.
જો કે અરજદાર આ પોલીસકર્મી ફિરોઝખાનને રસ્તામાં મળતાં અને લાયસન્સની માગણી કરતાં બપોરે ૧૨ વાગ્યે પોલીસ મથકે આવવા જણાવ્યું હતું. બપોરે બે સરકારી પંચો સાથે રાખી ડિજિટલ વોઇસ રેકોર્ડની મદદથી લાંચનું છટકું ગોઠવવામાં આવ્યું હતું. દરમ્યાન પોલીસકર્મીએ અરજદારને ફરીથી જામીન લઇ લાંચની રકમની માંગ કરી તે રકમ અન્ય પોલીસકર્મી વીરદેવસિંહ જયેન્દ્રસિંહ ઝાલાને આપી દેવા જણાવ્યું હતું. લાંચની આ રકમ સ્વીકારી પેટીપલંગના ગાદલા નીચે મૂકી દેવામાં આવી હતી આ વેળાએ એ.સી.બી.એ આ બંને પોલીસ કર્મીઓને રંગેહાથ પકડી પાડયા હતા.
આ કેસ અહીંની અધિક સેશન્સ જજ (વિશેષ એ.સી.બી. જજ)ની કોર્ટમાં ચાલી ગયો હતો. કેસની ટ્રાયલ દરમ્યાન ફરિયાદી હોસ્ટાઇલ થયા હતા. તેમ છતાં સરકાર તરફેના સાહેદો, દસ્તાવેજી આધારો, વૈજ્ઞાનિક પુરાવાઓને તથા સરકારી વકીલની ધારદાર દલીલોને ગ્રાહ્ય રાખવામાં આવી હતી અને ફિરોઝખાન જુસબખાન પઠાણ તથા વીરદેવસિંહ જયેન્દ્રસિંહ ઝાલાને તકસીરવાન ઠેરવવામાં આવ્યા હતા. બંનેને ત્રણ વર્ષની સખત કેદની સજા તથા બંનેને રૂા. ૫૦૦૦-૫૦૦૦નો દંડ અને દંડ ન ભરે તો વધુ એક માસની સજા ફટકારવાનો હુકમ કરવામાં આવ્યો હતો.
