અમદાવાદઃ ગુજરાત એન્ટી કરપ્શન બ્યુરોએ 15 ડિસેમ્બર સોમવારે ગાંધીનગરમાં છટકું ગોઠવીને પોલીસ ઇન્સ્પેક્ટર અને કોન્સ્ટેબલને 30 લાખની લાંચ લેતા રંગેહાથ ઝડપી પાડ્યો હતો. ગાંધીનગરમાં CID ક્રાઇમ, CI સેલમાં ફરજ બજાવતા પોલીસ ઇન્સપેક્ટર અને એક આર્મ્ડ પોલીસ કોન્સ્ટેબલને રૂ.30 લાખની લાંચ સ્વીકારતા રંગે હાથ ઝડપી લેવામાં આવ્યા છે. આ ઘટનાને પગલે પોલીસ વિભાગમાં ભારે ખળભળાટ મચી ગયો હતો.

ACBના સૂત્રો પાસેથી જાણવા મળતી માહિતી અનુસાર ફરિયાદી એક જાગૃત નાગરિક છે, જેણે લાંચ આપવાનો ઇનકાર કરી ACBનો સંપર્ક કર્યો હતો. ફરિયાદ અનુસાર, CID ક્રાઇમ ગાંધીનગર ઝોન પોલીસ સ્ટેશનમાં કોલ સેન્ટરના એક ગુનામાં કોઈ કાર્યવાહી ન કરવા બદલ ફરિયાદી પાસે રૂ.30 લાખની લાંચની માંગ કરવામાં આવી હતી.

આ ફરિયાદના આધારે ACBએ 15 ડિસેમ્બરના રોજ ટ્રેપ ગોઠવ્યો હતો. ટ્રેપ દરમિયાન આરોપી આર્મ્ડ પોલીસ કોન્સ્ટેબલ વિપુલભાઇ બાબુભાઇ દેસાઇએ ફરિયાદી સાથે રૂબરૂ મુલાકાત કરી લાંચની રકમ સ્વીકારી હતી.

તપાસમાં બહાર આવ્યું હતું કે, સમગ્ર પ્રક્રિયામાં પોલીસ ઇન્સપેક્ટર પેથાભાઇ કરમશીભાઇ પટેલની સહમતિ અને સંડોવણી પણ હતી, જેના કારણે બંને આરોપીઓ પર ભ્રષ્ટાચારનો ગુનો લાગુ કરવામાં આવ્યો હતો. ACBની ટીમે સરગાસણ વિસ્તારમાં સ્વાગત સિટી મોલથી આગળ આવેલી ‘ધ ઓફિસીસ – હરી ગ્રુપ’ નામની નવી બનતી સાઇટ સામે જાહેર રોડ પર ટ્રેપ ગોઠવ્યો હતો. ટ્રેપ દરમિયાન પોલીસે 30 લાખ રૂપિયા કબ્જે કર્યા હતા.