છત્તીસગઢના બસ્તર ડિવિઝનમાં નક્સલવાદને જડમૂળથી ઉખેડી ફેંકવા માટે સુરક્ષા દળોએ રચેલી વ્યુહરચનામાં વધુ એક મોટી જીત મળી છે. સુકમા જિલ્લાના ગાઢ જંગલોમાં સુરક્ષા દળો અને નક્સલવાદીઓ વચ્ચે થયેલી ભીષણ અથડામણમાં જવાનોએ 12 નક્સલીઓને મોતને ઘાટ ઉતાર્યા છે. આ ઓપરેશનથી નક્સલી સંગઠનોને મોટો ફટકો પડ્યો છે અને સુરક્ષા દળોનું મનોબળ વધ્યું છે. રાજ્ય સરકાર અને પોલીસ પ્રશાસન લાંબા સમયથી આ વિસ્તારમાં સક્રિય નક્સલી કેડરને ખતમ કરવા માટે આક્રમક અભિયાન ચલાવી રહ્યા છે.

મળતી માહિતી મુજબ, DRG (ડિસ્ટ્રિક્ટ રિઝર્વ ગાર્ડ) સુકમાની ટીમે કિસ્તારામ પોલીસ સ્ટેશન વિસ્તારના પામલૂરના જંગલોમાં આ સફળ ઓપરેશન પાર પાડ્યું હતું. માર્યા ગયેલા 12 નક્સલીઓમાં કોન્ટા એરિયા કમિટીનો કુખ્યાત સચિન મંગડૂ પણ સામેલ છે, જે લાંબા સમયથી અનેક હિંસક ઘટનાઓમાં વોન્ટેડ હતો. સુકમા એસપી કિરણ ચવ્હાણના માર્ગદર્શન હેઠળ ચાલેલી આ અથડામણ બાદ ઘટનાસ્થળેથી એકે-47 અને ઇન્સાસ જેવા અત્યાધુનિક ઓટોમેટિક હથિયારોનો જથ્થો મળી આવ્યો છે.

છત્તીસગઢમાં છેલ્લા એક વર્ષથી નક્સલ વિરોધી અભિયાન અત્યંત તેજ બન્યું છે. વર્ષ 2025 ના ડેટા મુજબ, વિવિધ એન્કાઉન્ટરોમાં અત્યાર સુધીમાં કુલ 285 નક્સલીઓ માર્યા ગયા છે. જેમાંથી સૌથી વધુ 257 નક્સલીઓ બસ્તર ક્ષેત્રમાં જ ઠાર થયા છે, જેમાં બીજાપુર સહિત સાત સંવેદનશીલ જિલ્લાઓનો સમાવેશ થાય છે. આ ઉપરાંત, રાયપુર ડિવિઝનના ગરિયાબંદ જિલ્લામાં પણ 27 નક્સલીઓને ખતમ કરવામાં સુરક્ષા દળોને સફળતા મળી હતી. આ આંકડાઓ સાબિત કરે છે કે સરકાર નક્સલી હિંસા સામે 'ઝીરો ટોલરન્સ'ની નીતિ અપનાવી રહી છે.

આ સફળતા પાછળ સીઆરપીએફ (CRPF) ની 159મી બટાલિયન અને સુકમા ડીઆરજીની સંયુક્ત ટીમની મહેનત છે. તપાસ દરમિયાન ગોંડપલ્લી ગામ પાસેની પહાડી પર નક્સલીઓના છુપા અડ્ડાની જાણકારી મળી હતી. દરોડા દરમિયાન જવાનોએ બોલ્ટ-એક્શન રાઈફલ, મઝલ-લોડિંગ ગન, 12 બોરની સિંગલ બેરલ રાઈફલ અને સેલ્ફ લોડિંગ રાઈફલના 150 જીવતા કારતુસ સહિત વિસ્ફોટક સામગ્રી જપ્ત કરી છે. હાલમાં વિસ્તારમાં સર્ચ ઓપરેશન ચાલુ છે અને માર્યા ગયેલા અન્ય નક્સલીઓની ઓળખ કરવાની પ્રક્રિયા ચાલી રહી છે.